Na actualidade Internet supón un espazo fundamental de socialización e ocupa un lugar cada día máis importante na vida das persoas ao ofertar cada vez máis servizos. Internet ofrece acceso a coñecementos, a medios de información de todo tipo, así como a comercio, entretemento e a redes sociais.

Infelizmente en moitas páxinas de uso cotián, e en redes sociais de uso moi popular o topónimo do noso concello aparece deturpado. Parécenos importante intentar mudar estas situacións que imaxinamos moitas veces son froito do descoñecemento da nosa realidade lingüística. Nese sentido o noso concello como institución debería ter unha actitude activa en dar a coñecer e solicitar o respecto ao noso topónimo oficial ás persoas responsábeis desas páxinas e redes.

En base ao exposto, o Grupo Municipal do BNG solicita do Pleno da Corporación Municipal a adopción do seguinte

A C O R D O

1.- O goberno municipal contactará cos/as responsábeis de todas as páxinas web e redes socias nas que se detecte o uso deturpado do noso topónimo e desenvolverá as actuacións necesarias dentro do seu ámbito de actuación para corrixir esa situación e lograr o respecto e uso do noso topónimo correcto e oficial.