Só houbo dúas propostas do Goberno Municipal neste pleno. A primeira, autorizar o investimento de 80.000 euros na compra dos terreos onde se ubica o castro da Croa para a súa posta en valor, foi aprobada por unanimidade. Na segunda, a sinatura do Pacto dos Alcaldes para o Clima e a Enerxía, o BNG considerou que supón un compromiso demasiado esixente para ser aprobado a dous meses vista do comezo dun novo mandato polo se abstivo, ademais de criticar que o noso concello non se adhira a outros proxectos como a Asociación de Entidades Locais pola a Lingua.

Das tres mocións presentadas polo BNG, a primeira, a respecto do pintado e sinalización do aparcadoiro de San Lázaro, foi aprobada por unanimidade.

Moi distinta sorte correu a segunda, relativa ás actuacións desde o eido local a prol da igualdade entre homes e mulleres. Censurábase ao Goberno Municipal por non ter executado os acordos aprobados en pleno por unanimidade ao longo do presente mandato, como a creación do Centro de Información á Muller, a elaboración dun estudo de necesidades e posterior protocolo de actuación para o acompañamento e protección das mulleres vítimas de violencia de xénero, desenvolvemento de plans de emprego destinados á empregabilidade das mulleres, a erradicación do acoso laboral, etc. e esixía a execución de ditos acordos, ademais de apoiar as mobilizacións do movemento feminista para este 8 de marzo. A señora Varela perdeuse tratando de explicar “todo” o que fixeron pero sen aceptar todo o que non fixeron e que eles apoiaron cando se presentaron as propostas. NP votou en contra utilizando a descualificación e a terxiversación interesada como argumentos. O PP abstívose escudándose en que non apoian folgas, cando o que realmente sucede é que o Partido Popular nin cre na igualdade nin a quere. Así que, cos votos favorábeis só de BNG e PSOE, a moción non foi aprobada.

A terceira moción do BNG, a respecto da seguridade viaria, tamén recriminaba ao Goberno Municipal que multitude de actuacións moi necesarias para mellorar a seguridade, como o incremento e visibilización de pasos de peóns, obras de accesibilidade e zonas 30, reordenación do tráfico, aumento e mellora da sinalización, etc., aprobadas por unanimidade, seguen a día de hoxe sen executar. Esixiuse que se leven a cabo. O alcalde insistiu en que non terían problema en apoiar a moción se se cambiaban certos termos (denunciar a pasividade). O que non entende o Sr. Piñeiro é que non queremos que aproben máis mocións, senón que as leven a cabo. E novamente obtívose o voto en contra do goberno de NP. Pero neste caso si se aprobou a moción cos votos favorábeis de BNG, PSOE e PP.

As dúas mocións do PSOE obtiveron a unanimidade. Unha delas solicitaba o servizo de auga potábel e saneamento á zona das Carrouchas e a outra dotar á Policía Local de equipamento homologado.

As mocións do PP relativas, unha á redución da taxa de recollida de lixo e, outra, á elaboración dun censo municipal de persoas maiores que vivan soas,  foron aprobadas por unanimidade. A relativa á falta de resposta por parte do Concello aos escritos presentados polas distintas formacións políticas, que propoñía a reprobación do alcalde, aprobouse cos votos de BNG, PP e PSOE. Evidentemente NP votou en contra. E a que propoñía

Rematou o pleno en tempo. Mais o traballo do BNG continúa día tras día para mellorar a nosa vila.