pleno

A proposta máis importante por parte do goberno foi a reforma do polideportivo de Venecia. O BNG defendeu no pasado xuño a necesidade absoluta e urxente de arranxar as numerosas deficiencias que presenta. Aprobouse por unanimidade e o alcalde dixo ter a intención de facelo no verán para producir menos trastornos na actividade deportiva. Evidentemente, non foi así. Mais neste pleno de outubro votouse por unanimidade a aprobación inicial do proxecto técnico para a obra, que se financiará, tal e como tamén propuxera o BNG, co superávit de 2017. É unha boa nova. A ver para cando.

O BNG presentou dúas mocións. A primeira delas reprobaba ao alcalde e a concelleira de promoción económica e emprego, a Sra. Varela, pola súa nula xestión ao fronte da concellería. Lembrámoslle que non só non  elaboraron o plan de emprego xuvenil ou a solicitude de subvencións para obradoiros de emprego aprobadas por unanimidade no pleno  senón que foron incapaces de propoñer medidas propias e efectivas a tal efecto. Tamén propoñía a moción, unha vez máis, o plan de emprego, a participación nos programas de cooperación doutras administracións para o emprego (obradoiros de emprego entre outros) e a habilitación na web do concello dun espazo informativo sobre oferta e demanda de emprego. Aprobouse cos votos favorábeis de BNG, PSOE e PP e o voto en contra de NP, que se expresaron moi satisfeitos de contribuír ao emprego mediante a contratación de persoal no propio Concello.

A segunda poñía en destaque a sensación asentada entre a veciñanza de que A Pobra vive nunha profunda inseguridade urbanística e propoñía cubrir de xeito inmediato a praza de Arquitecto Superior aprobada en xaneiro de 2016, asignar ao servizo de urbanismo os recursos necesarios para restaurar e manter a legalidade urbanística e arbitrar procedementos de control que vixíen o cumprimento da normativa urbanística. O goberno aceptou a maior pero non lle gustou  que a moción incluíra “restaurar” e por medio do concelleiro de Servizos Sociais (non o de Urbanismo, que é o Alcalde, responsábel da desfeita) propuxo unha emenda consistente en substituír a palabra por “exercer de maneira eficaz”. A corporación non aprobou a emenda e a moción tampouco foi aprobada polos votos en contra de NP e PP. Ou sexa, NP agocha a cabeza como a avestruz e o PP prefire a política de “ti vai facendo” que tan querida lles é.

Polo demais, aprobouse a acta do pleno ordinario de maio e só houbo tres propostas do goberno municipal, a mencionada do polideportivo, a aprobación dos festivos locais para 2019 e unha subvención nominativa.

Os festivos locais, os de sempre, luns dos Pincheiros e luns do Nazareno, aínda que a data numérica viña equivocada... Aprobáronse cos votos favorábeis de NP, PP e PSOE. O BNG abstívose. Seguimos considerando que hai que darlle unha voltiña e procurar un consenso na recuperación de festas tradicionais como o San Xoán ou o Entroido.

A subvención ao Club de Remo para financiar a bandeira feminina disputada na Pobra foi aprobada por unanimidade. Agardemos que tarden bastante menos en pagar do que tardaron en traela ao pleno para a súa aprobación.

Tanto PP como PSOE presentaron mocións reclamando arranxos e melloras en Lamas y Andrés. A do PSOE foi emendada por NP para acometer estas melloras cos orzamentos de 2018 e non co remanente de 2017 como dicía a moción. Emenda e mocións aprobáronse por unanimidade.

O PP presentaba outras dúas mocións. Unha delas para que se limpen rexistros e sumidoiros co fin de evitar inundacións nos baixos, aprobada por unanimidade. A outra, xa coñecida, defendendo que goberne a lista máis votada. Trátase dunha proposta trampa que pretende manipular a lei electoral en beneficio dos intereses do propio Partido Popular, negando a calidade democrática dos pactos electorais e  pervertendo o sentido do voto popular e ignorando que a xa bastante mermada democracia española é representativa e non presidencialista.

Rematou o pleno coa resposta a unha pregunta presentada polo BNG a respecto do torneo de fútbol solidario que na próxima edición non se celebrará na Pobra senón en Rianxo. O alcalde non soubo como explicar a tardanza do seu goberno en conceder as dúas datas que lle solicitaban e  descargou a responsabilidade na organización aínda que se manifestou disposto a seguir apoiando este torneo.

No que queda de ano haberá varios plenos, ordinario e extraordinarios. Esperemos que se traduzan en obras e non pasen a engrosar as cifras de superávit de 2018, como sucedeu en anualidades anteriores.

O BNG presentou onte, por vía de urxencia, unha moción ao pleno solicitando o apoio da corporación aos "19 de Meirás" que iniciaron hoxe as súas declaracións nos xulgados de Betanzos, tras a demanda criminal presentada pola familia do ditador e a Fundación Franco por realizar un “acto cívico, pacífico e democrático para reclamar que o Pazo de Meirás sexa devolto ao patrimonio galego”.

A moción foi aprobada polos votos a favor do BNG e NP, a abstención do PSOE e o voto en contra do PP

Un Pleno Extraordinariamente Ordinario

A traxedia da vaga de lumes forestais do pasado outubro provocaron a morte de catro persoas, arrasaron máis de 35.000 hectáreas e puxeron en situación de grave risco núcleos urbanos e miles de persoas.